Póstmódernískur sitúasjónisti þýðir Baudelaire, en kemur líka á ljóðahátíð

Surrealism meets poetry-as-noise meets 17th century dissidents and refusers. Teasing hints of folk classics (she walked through the fair) are inserted into chance texts and suggestive vocabulary which may just lead you up a garden path. Sometimes the ride is worthwhile but hold onto your hat. - Steve Spence um Blade Pitch Control Unit eftir Sean Bonney

Einn af dularfyllstu gestum Alþjóðlegu Ljóðahátíðar Nýhils sem fram fer 12.-14. október næstkomandi er Bretinn snarhenti Sean Bonney. Bonney yrkir prósa og ljóðrænu af margvíslegum toga, og er ef til vill þekktastur fyrir framúrstefnulegar og undirfurðulegar "þýðingar" sínar á ljóðum Baudelaires, sem birtar hafa verið hinu virta ljóðavefriti Onedit. Prósaverk Seans eru hins vegar meira í ætt við einhvers konar póst-módernískan sitúasjónisma, en ljóð sem nú hefur birst á Tregawöttum ber því ágætis vitni.

Forsala Fönixins hafin: Þúsundkall!

Í byrjun nóvembermánaðar kemur út ljóðabókin Þjónn, það er fönix í öskubakkanum mínum eftir Eirík Örn Norðdahl, hjá Nýhil. Bókin, sem er vel ríflega 200 síður, inniheldur m.a. 50 blaðsíðna ljóðabálk um liðhlaupa úr Þorskastríðinu, 8 blaðsíðna ljóðahljóðabálkinn Einræðisherrarnir, og 60 blaðsíðna róttæka endurvinnslu á Tímanum og vatninu eftir Stein Steinarr, auk ljóðsins Parabólusetning, sem hlaut viðurkenningu í Ljóðstafi Jóns úr Vör fyrr í ár, og fjölda annarra ljóða, bæði ljóðmælandi og framúrstefnandi nýmæla í íslenskri ljóðagerð. Þá skrifar Ingólfur Gíslason formála að bókinni, Haukur Már Helgason er höfundur miðmála og eftirmálann ritar Bryndís Björgvinsdóttir.

Prentkostnaður er höfundum og forlögum oft þungur róður, og því hefur Nýhil gripið til þess ráðs að selja verk þetta í forsölu á verði sem varla á sinn líka, þar sem gefinn verður 60% afsláttur af útsöluverði, sem verður 2.500 krónur, og bókin seld á sléttan þúsundkall.

Ath.: einungis 200 eintök verða seld í forsölu.

Á kápu bókarinnar lýsir ljóðskáldið Valur Brynjar Antonsson bókinni svo: „Nú í þessa tíð þarf eitthvað eins og öxulveldi hins illa, öxul yfir vötnin, öxul sem spannar Ísafjörð, flugstöð Leifs Eiríkssonar og Helsinki City, til að skjóta fallbyssukúlum í hnakkann á hversdagsleikanum, töfrunum og einfaldleikanum. Nú þurfum við hryðjutíð, fellalög og kannski ekki síst hreðjatök, því að þegar kemur að Estrógeni, þá sýnir Eiríkur að „less is more“.“

Bókina er hægt að panta með að senda skáldinu póst á netfangið kolbrunarskald@hotmail.com.

10 þúsund tregawött eru fjölbiðill 3ALN

Tekist hefur samkomulag við framsæknasta ljóðamiðil Íslendinga, 10 þúsund tregawött, um að sá síðarnebdi taki að sér að hlutverk "media partners" ellegar "fjölbiðils" 3ju Alþjóðlegu Ljóðahátíðar Nýhils. Tregawöttin hafa um langt skeið verið eini vettvangur öflugs þýðingastarfs á samtímaljóðlist, og fer því vel á að þýðingar og kynningar á verkum gesta ljóðahátíðar fari þar fram.
Nálgast má allt efni á Tregawöttunum sem snýra að 3ALN með því að smella á þar til gerðan flokk.
Góðar stundir,
V.

Gestir ljóðahátíðar byrjaðir að rokka

Einn af þeim ástsælu rithöfundum sem sækir landið heim í tilefni 3ju ljóðahátíðar Nýhils er kraftaköggullinn Linh Dinh. Hann er marverðlaunaður bæði sem prósahöfundur og ljóðskáld, en verk hans eru oftar en ekki refleksjónir um gildrur tungumálsins. Sjálfur er Dinh tvítyngdur, fæddur í Víetnam en uppalinn í BNA. Hann hefur tekið að blogga hér. Á Tregawöttunum má einnig sjá Linh Dinh lesa upp.

Þá hefur Eiríkur Örn Norðdahl snarað ljóði eftir Svíann hugumprúða Leif Holmstrand yfir á íslensku, og birt á þeim sömu Tregawöttum. Leif er rithöfundur sem jafnframt hefur gert það gott á öðru sviði, líkt og á við marga meðlimi Nýhiles -- en Leif þykir mjög upprennandi myndlistarmaður í Svíþjóð.

3ja aljóðlega ljóðahátíð Nýhils

Ágætu landsmenn.

Nýhil blæs til sinnar 3ju alþjóðlegu ljóðahátíðar. Hún mun fram fara í Reykjavík 12.-14. október og hafa eftirtalin erlend skáld staðfest komu sína:
- Lars Skinnebach
- Leif Holmstrand
- Markku Paasonen
- Vilja-Tuulia Huotarinen
- Sean Bonney
- Angela Rawlings
- Linh Dinh

Á næstu dögum birtast kynningartextar um skáldin auk þess sem dagskrá verður auglýst.

N.

Eiríkur Örn Norðdahl ritar tímamótagrein í Nypoesi

Nýlega birtist á heimasíðu Nypoesi grein eftir Eirík Örn Norðdahl sem nefnist "The importance of destroying a language (of own's one) TAKE TWO". Nypoesi er frábært norrænt tímarít um framsækna ljóðagerð, en ritgerð Eiríks hefur þegar vakið athygli í alþjóðlegum listakreðsum, því stórbokkinn Charles Bernstein linkar í hana af bloggi sínu og segir: "Eiríkur Örn Norðdahl a young Icelandic poet has just published a terrific essay on new transnational poetry". Lesið hina terrifísku esseiju HÉR.

Money, money!

Fimmtudaginn næstkomandi (10. maí) afhendir útgáfuforlagið Nýhil
Mæðrastyrksnefnd allan ágóða af sölu metsölubókarinnar Hannes –
Nóttin er blá, mamma eftir Óttar M. Norðfjörð. Fer afhendingin fram í
húsakynnum Mæðrastyrksnefndar að Hátúni 12 og hefst klukkan 15:00.

Hannes – Nóttin er blá, mamma er 1. bindi í ævisögu Hannesar
Hólmsteins Gissurarsonar. Hún kom út fyrir síðustu jól og sat í
margar vikur í efsta sæti metsölulista Eymundsson og varð jafnframt
ein mest selda bók ársins. Ágóði af sölu bókarinnar reyndist rúmlega
300.000 kr.

Von er á 2. bindi ævisögu Hannesar, Hólmsteinn, 1. nóvember 2007 og
mun allur ágóði hennar einnig renna til nefndarinnar.

Frekari upplýsingar veitir Óttar M. Norðfjörð í síma 866-9276,
netfang ottarmn@gmail.com

Fádæma vinsældir Handsprengju í morgunsárið

Nýjasta afurð Nýhils, ljóðabók Ingólfs Gíslasonar og Eiríks Arnar Norðdahl, fer afburða vel af stað enda lesendur einróma um að bókin sé bæði hin skemmtilegasta og áhugaverðasta. Meðal annars segir bloggarinn Þór Steinarsson að bókin sé "skemmtilegasta og vandaðasta ljóðabók sem ég lesið í langan tíma."

Silja Aðalsteinsdóttir, hjá Tímariti Máls og menningar segir baráttukvæðin bæði öflug og skondin, og hnýtir við að hún sé þó einna hrifnust af sjálfum höfundarlýsingunum.

Haukur Már Helgason segir bókina "skíra með brennisteini".

Þórdís Gísladóttir segir m.a. á síðu sinni: "Þið eigið auðvitað öll að kaupa þessa bók og lesa ykkur til gleði á meðan kosningaáróðurinn bylur á okkur öllum einsog stormur sem fyllir augun af sandi (og gerir bílrúðurnar mattar). [...] Verðinu er stillt í hóf, ég fullyrði að þið hafið öll efni á að kaupa ykkur Handsprengju í morgunsárið og þó þær væru tvær."

Og Þröstur Helgason, sjálfur generáll Lesbókarinnar, segir bókina "forvitnilega" í pistli sínum í dag.

Í tilefni af því hefur Handsprengjan eignast sitt eigið Moggablogg!

Í viðtali við Nýhil í dag segjast Eiríkur og Ingólfur hrærðir og hissa. Þeir segjast í raun ekki hafa neina fyrirmynd að skrifunum, þau séu fyrst og fremst gerð til að hafa gaman af þeim.

Og nú er hægt að festa kaup á bókinni á netinu! Kíkið inn hjá Eymundsson!

Handsprengja í morgunsárið

Kæri heimur - fjölmiðlamenn, oflátungar, krúsídúllur, einræðisherrar og allra þjóða yndislingar.

Bomburnar eru byrjaðar að falla, sírenuvæl fyllir allar hlustir, vessar Íslendinga flæða niður torg og götur - það er kortér í kosningar og byltingin er á síðasta söludegi! Aldrei hefur riðið meira á að Nýhil, eina forlag Íslands sem eitthvað mark er á takandi, stolt eins og þaninn vindhani með brjóstið upp í norðangarra, kynni komandi dagskrárlið: Ljóðabókina Handsprengja í morgunsárið - baráttukvæði.

Í téðri bók, sem líkja má við hryðjuverkamann sem sprengir sig í tætlur á leiðinni Kleppur-Hraðferð (frítt í strætó), er að finna ljóðaþýðingar Ingólfs Gíslasonar og Eiríks Arnar Norðdahl. Í fyrri hluta bókarinnar eru ljóð eftir útlendan óþjóðalýð á borð við Radovan Karadzic, Saddam Hussein og Osama bin Laden, en í þeim síðari er það innlendur óþjóðalýður sem purkunarlaust er beygður í duftið þar sem þeir Ingólfur og Eiríkur fara hamförum í svonefndum róttækum ljóðaþýðingum þar sem hinn ljóðræni kjarni hefur verið mergsoginn úr ræðum, textum, ummælum, ljóðum og greinum manna á borð við Jón Magnússon, Valgerði Sverrisdóttur og Egil Helgason - svo eftir situr ekkert nema nakinn sannleikurinn um fólkið sem þið þóttust þekkja úr sjónvarpsfréttunum.

Formlegur útgáfudagur bókarinnar er baráttudagur verkamanna, 1. maí, við upphaf hins afturgengna sumars ástarinnar, 2007.

Kápu hannaði Goddur.
Haukur Már Helgason á eina þýðingu í bókinni.

EFNISYFIRLIT

1. hluti

Handsprengja í morgunsárið - Radovan Karadzic
Dragðu sverðið - Saddam Hussein
Tími rúmbunnar - Silvio Berlusconi
Eldklerkur dögunar - Ernesto Che Guevara (f. Fidel Castro)
Þér eruð Túrkmenar - Saparmurat Niyazov (Túrkmenbasí)
Þýskar stúlkur ávarpa Foringjann - óþekktar stúlkur í Hitlersæskunni
Adolf Hitler - óþekktur meðlimur austurrísku Hitlersæskunnar
Ferðalag barns sem hefur yfirgefið land helgidómanna - Osama bin Laden
Vín ástarinnar - Ayatollah Khomeini
Erindi úr kvæðinu Líf - Ronald Reagan
Óþekktir hermenn - Avraham Stern
Kjarnorka - Harry Barnard, liðþjálfi

2. hluti

Besti dagur lífs míns - Björn Bjarnason
Þjónn, það er hakakross á nasistafánanum mínum - Jón Magnússon
Jöfnuður er góður en við verðum ga ga ef við gáum ekki að okkur - Egill Helgason
Ekkert áhyggjuefni - Hannes Hólmsteinn Gissurarson
Lowest energy prices - Davíð Oddsson
Fram til Draumalandsins! - Jón Sigurðsson
Ísland er nú herlaust land (hugsun til enda) - Valgerður Sverrisdóttir
Þegar ballið er búið - Geir H. Haarde
Sérálit 6. júni, 2003 - Halldór Ásgrímsson (Haukur Már Helgason þýddi)


Frekari upplýsingar um bókina er hægt að fá hjá Ingólfi eða Eiríki:

Ingólfur Gíslason: ingog@internet.is - s. 698-0422
Eiríkur Örn Norðdahl: kolbrunarskald@hotmail.com - s. 00 358 442 935 960 (Finnlandi).

Framtíðarlandið

Veru og Linus enn hampað! Og það erlendis!

Hinni myrka og magnþrungna prósasafni Jesse Balls og Þórdísar Björnsdóttur, Vera & Linus, er hampað í hástert á vefsíðum hins virta óháða bókmenntatímarits Rain Taxi. Ritdóminn skrifar Laird Hunt, og segir Veru & Linus 'a great success' en óþarft er að vitna í smáatriðum í dóminn þar eð hann má auðveldlega nálgast hér:
http://www.raintaxi.com/online/2006winter/ball.shtml

Þá vill Nýhil minna á að sjálft Morgunblaðið birti snemma á þessu ári (laugardaginn 6. janúar) afar lofsamlegan og ítarlega ritdóm í Lesbók sinni skrifaðan af Birni Þór Vilhjálmssyni, undir titlinum 'Vellíðunarlögmálið allsráðandi'. Þar segir m.a.:

„Skáldverkið um Veru og Línus er ekki
hefðbundið og lestur þess krefst ákveðinnar
þolinmæði sem og opins hugarfars gagnvart
tilraunakenndum aðferðum við textasmíðar.
… það sem gerir lesturinn
athyglisverðan og heldur lesandanum við efnið
er rík sköpunargáfa og sægur af óvæntum
myndum og hugmyndatengingum.
… listaverkið er ekki búið til svo að
neytandanum líki vel við það. Það ögrar og
ræðst á neytandann og neyðir hann, ef allt
lukkast vel, til að grípa til ofbeldis á móti.“

Verið ekki lurar og kaupið Veru og Linus hér.

Gefins bækur í Nýhil!

Nú er Nýhillinn þinn í góðu skapi og þegar hann er í góðu skapi, þá gefur hann bækur!

Í bókaverslun Nýhils, að Klapparstíg 25 (sama húsi og Elvis og Smekkleysa), fæst nú frí bók með hverjum tveimur keyptum bókum. Þegar þú kaupir tvær bækur færðu því eina bók til viðbótar, já eða kaupbótar, þér að kostnaðarlausu. Rosalega sniðugt! Vitanlega er borgað fyrir dýrari bækurnar og er alger óþarfi að fela það í smáu neðanmálsletri; þetta ættum við öll að vera farin að vita.

Í stuttu máli og einföldu: ‘3fyrir2’ útsala í Nýhil.
Á útsölunni eru allir Nýhilstitlar frá fæðingu þessa litla útgáfurisa og mikið úrval bókmennta frá Útlandinu.
– Kauptu t.d. 3 litlar og sætar bækur á 1000 kr.
– Kauptu 3 Norræn bókmenntaverk á 2000 kr.
– Fáðu alla 3 Nýhilnóvelana sem gefnir voru út fyrir jól, á mun ódýrara verði en annars staðar þekkist.
– Hvað sem þú gerir, ekki láta þetta frábæra tilboð fram hjá þér fara!

Þorra-Nýhill í Stúdentakjallaranum

Nýhil þreyir Þorrann líkt og aðrir landsmenn. Á upplestrarkvöldi nk. fimmtudagskvöld í Stúdentakjallaranum munu nokkrir súrsaðir og sviðnir Nýhils-ljóðakjammar leika fyrir miklum ljóðrænum Hrunadansi, ásamt eldri ungskáldum.

Á kvöldinu koma fram ungir og kynþokkafullir talentar sem hafa sjaldan eða aldrei komið fram undir merkjum Nýhils og því er full ástæða fyrir kresin ljóðafól að mæta með lonnéttur, stigablað og loftvog.

Hrútspungarnir eru:

* Gísli Hvanndal Ólafsson
* Þórdís Björnsdóttir
* Ingólfur Gíslason
* Una Björk Sigurðardóttir
* Örvar Þóreyjarson Smárason
* Björk Þorgrímsdóttir

Staður: Stúdentakjallarinn v. Hringbraut
Tími: fimmtudagskvöldið 25. janúar kl. 20:30

EÖN fær viðurkenningu í ljóðastaf!

Nýhil getur vart á heilu sér tekið sökum stolts og raupar nú út um allan bæ, fullt gorgeirs, yfir velgengni Eiríks Arnar Norðdahl á Ljóðastafi Jóns úr Vör. Hróðum ferfallt húrra og skálum í botn. Nánari upplýsingar:
Kistan
Tregawöttin
Það var ljóðið 'Parabólusetning' sem vann Eiríki viðurkenninguna. Hip hip húrra húrra!

Edda fær áminningu

Eins og margir muna sendi Nýhil Neytendastofu kvörtun vegna vinnubragða Eddu - útgáfu síðastliðin desember, en þá auglýsti forlagið að ævisaga þeirra, Ljósið í djúpinu, væri mest selda ævisaga landsins, þegar sannleikurinn var sá að Hannes - Nóttin er blá, mamma bar þann eftirsótta titil. Erjur forlaganna hafa nú verið leiddar til lykta og er niðurstaða Neytendastofu eindregin. Eftir að hafa leitast útskýringa á umræddri auglýsingu Eddu, með bréfi og ítrekun sem forlagið svaraði ekki, hefur Neytendastofa ályktað að auglýsingin hafi verið ósönn og brotið í bága við lög. Edda - útgáfa er jafnframt beðin um að sýna framvegis nákvæmni í auglýsingum sínum.

Nýhil óskar sjálfu sér og réttlætinu til hamingju með sigurinn!

Ályktun Neytendastofu er svohljóðandi:
"Neytendastofa sendi Eddu – útgáfu hf. bréf, dags. 7. desember sl., í tilefni erindis Nýhils til Neytendastofu, dags. 6. desember sl. Í erindinu var kvartað yfir því að í auglýsingu Eddu – útgáfu sem birtist í Fréttablaðinu 3. desember sl. segir m.a. að bókin Ljósið í djúpinu sé mest selda bókin í flokki ævisagna samkvæmt metsölulistum. Hið rétta sé að skv. metsölulistum sem hafi verið nýbirtir á þessu tíma hafi metsölubókin í flokki ævisagna verið Hannes – Nóttin er blá, mamma. Auglýsingin sé því brot á ákvæðum 6. gr. laga nr. 57/2005 um óréttmæta viðskiptahætti. Í bréfi Neytendastofu var óskað athugasemda og skýringa Eddu – útgáfu í tilefni erindisins. Ekkert svar barst innan tilskilins frests.
Með bréfi Neytendastofu til Eddu – útgáfu dags. 21. desember sl. var erindið ítrekað og fyrirtækinu gefinn frestur til 29. desember sl. til að koma að athugasemdum og skýringum. Jafnframt var tilkynnt að búast mætti við að málið yrði afgreitt af Neytendastofu að þeim tíma liðnum. Ekkert svar hefur borist stofnuninni.
Með erindinu fylgdi m.a. útprentun af fréttavef Morgunblaðsins 30. nóvember sl. Þar segir m.a. að Hannes – Nóttin er blá, mamma sé í fyrsta sæti bóka í flokki ævisagna. Segir í fréttinni að hún byggi á könnunum sem fram fóru á Íslandi dagana 21. – 27. nóvember sl. Þar sem Edda – útgáfa hefur ekki sýnt fram á að fréttin sé röng verður ekki annað ráðið af gögnum málsins en að framangreind auglýsing Eddu – útgáfu sé í andstöðu við þær skoðanakannanir sem fréttin byggir á. Neytendastofa fær því ekki annað séð en að auglýsingin brjóti í bága við 6. gr. laga nr. 57/2005 um óréttmæta viðskiptahætti.
Neytendastofa beinir þeim tilmælum til Eddu – útgáfu að fyrirtækið beiti framvegis nákvæmni í auglýsingum sínum.
Virðingarfyllst f.h. Neytendastofu
Sigurjón Heiðarsson"

Vera & Linus fær lofsamlegan dóm hjá SPD Books

Á heimasíðu dreifingarfyrirtækisins Small Press Distribution er að finna síðu þar sem starfsfólk velur sínar uppáhaldsbækur og fjallar stuttlega um þær. Neil Alger fjallar þar nú um bókina Vera & Linus eftir Jesse Ball og Þórdísi Björnsdóttur sem út kom hjá Nýhil árið 2006. Alger segir í lok dómsins: "In short, one of the best things I’ve read in a really long time." En gagnlegast er þó að lesa dóminn í heild sinni hér og síðan að kaupa bókina hér.
Eins vill Nýhil vekja athygli landsmanna á kveðskap eða prósa eftir þau sömu skötuhjú sem birtist í opnuauglýsingu frá Landsbankanum í Fréttablaðinu og Morgunblaðinu á gamlársdag, en skoða má pdf af Fréttablaðinu þann dag hér og fletta upp á síðum 14-15.

Afrek?

Loksins, loksins gefur Sigurður Hróarsson, nýr ljóðagagnrýnandi Fréttablaðsins, ljóðabók færri en fjórar stjörnur!

Ljóðabókin sem stöðvaði 4 til 5 stjörnu dóma hans er enginn önnur en A-Ö eftir Óttar M. Norðfjörð , sem gefin er út undir formerkjum Nýhil, en hún fékk einungis 1 stjörnu hjá Sigurði.

Við óskum Óttari til hamingju með þetta mikla "schlecht aber gut"-afrek!

Bóksalar, Hannes, Eitur og Norrænar bókmenntir

Fjallað er um bókmenntaverðlaun bóksala í Blaðinu í dag. Þar er Kristján Freyr Halldórsson, verslunarstjóri Eymundsson, tekinn tali og segir hann upp og ofan af verðlaunum. Segist Kristján sjálfur hafa valið Eitur fyrir byrjendur eftir Eirík Örn Norðdahl sem bestu íslensku skáldsöguna. Þá tjáir Kristján sig einnig um ævisögu Óttars Martin Norðfjörð, Hannes - nóttin er blá, mamma, og segir: „Þetta er mjög áhugavert mál frá a-ö. Ég hef lúmskt gaman af þessu öllu saman, sérstaklega þegar maður heyrir frá bókaútgefendum sjálfum sem margir hverjir eru að malda í móinn. Hannes er bók því hún er með IBSN númer. Mín Biblía fyrir jólin eru Bókatíðindi sem Félag íslenskra bókaútgefenda sér um og þar er bókin skilgreind sem bók og sem slík er hún skráð inn í okkar verslanir. Hannes hefur selst vonum framar, Óttar var að árita í einni af okkar verslunum um helgina og það fóru mörg hundruð eintök út. Málstaðurinn er góður en allur ágóði rennur til Mæðrastyrksnefndar. Mér finnst þetta ákaflega göfugt og gott framtak hjá honum Óttari fyrir jólin og ég bíð spenntur eftir næsta bindi.“

Þá er rétt að benda á að dómur Þórunnar Hrefnu Sigurjónsdóttur um Eitur fyrir byrjendur í Víðsjá. Sagði Þórunn m.a.: "Sorgin í sögunni, sem er umtalsverð, er ekki tækluð með neinu sorgarklámi, sem betur fer. Sögumaðurinn sýnir hæfilega nærgætni þó að hann sé stundum meinhæðinn, sem er undarlega heillandi, eins sikk og það hljómar. [...] Eiríkur Örn Norðdahl sýnir á sér nýjar hliðar með Eitri fyrir byrjendur. Hún er dýpri, einhvern veginn fegurri en fyrri bækur hans. Og þó að kafað sé í innsta eðli mannlegrar sorgar er það gert af hæfilegum stráksskap þess sem veit að sorgin og sektin verða alltaf til staðar hvort sem við lokum okkur inni eða eitrum fyrir okkur. Þess vegna er um að gera að láta byrðarnar ekki sliga sig...og bara flissa svolítið."

Dóminn má lesa hér.

Loks má geta þess að nýlega birtist grein í tímaritinu Nordisk Litteratur um Nýhil. Ingi Björn Guðnason skrifar. Greinina má lesa (á ensku) hér.

Eitur fyrir byrjendur má kaupa með því að smella hér, og Hannes má kaupa með því að smella hér.

Húðlit auðnin prísuð og lofsungin

Ritdómur birtist þann 20. desember í Morgunblaðinu um ljóðabókina Húðlit auðnin eftir Kristínu Eiríksdóttur sem út kom hjá Nýhil fyrr á árinu. Ritdómari fer lofsamlegum orðum um bókina og segir hana "sterkt og hnitmiðað verk" sem "vitnar um ótvíræða hæfileika ungs skálds." Kaupa má bókina á netinu hér og í ljóðabókaverslun Nýhils á Klapparstíg 25 (í plötubúð Smekkleysu).

Arnaldur fallinn!

Hannes - Nóttin er blá, mamma heldur áfram að gera það gott. Allir gagnrýnendur sem skrifað hafa um ævisöguna hafa gefið henni 5 stjörnur og í vikunni voru Bókmenntaverðlaun bóksala veitt og lenti bókin í 3. sæti í flokki ævisagna.

Nýjustu gleðifréttirnar eru svo þær að Hannes er komin í efsta sæti á metsölulistanum sem gerður er út frá Pennanum-Eymundsson og Bókabúð Máls og menningar, nú örfáum dögum fyrir jólin. Hefur ævisagan þar með rutt Konungsbók eftir Arnald Indriðason úr vegi, en hún hefur trónað efst á listanum frá því að hún kom fyrst út í nóvember.

Við óskum bæði Hannesi til hamingju og Íslendingum, enda ekki á hverjum degi sem "einræðisherra" eins og Arnaldur er toppaður á metsölulistum landsins.

Nýhil: Lætur engan ósnertan

Menntaskólatímaritið Verðandi mælir með þremur af nýjustu bókum Nýhils í nýjasta tölublaði sínu. Alls mælir blaðið með sjö nýjum bókum, og því ljóst að Nýhil ber höfuð og herðar yfir samkeppnisaðila sína í þessu bókaflóði.

Skáldsögur Nýhils lofaðar

Bókmenntafræðineminn Kristján Atli Ragnarsson hefur nýlokið við að lesa sig í gegnum skáldsagnahluta jólabókaflóðs Nýhils, og er skemmst frá því að segja að hann eys bækurnar miklu lofi.

Um Svavar Pétur & 20. öldin eftir Hauk Má Helgason segir hann meðal annars: "Svavar Pétur og 20. öldin er fyrsta skáldsaga Hauks Más Helgasonar og mætti því tala um að hann mæti á senuna með látum. Það fyrsta sem maður tekur eftir við söguna er hversu þéttur prósinn hjá honum er. [...] Með frásögn Svavars Péturs færir Haukur Már síðustu öld og núverandi saman með nýstárlegum hætti svo úr verður kolsvört háðsádeila á markaðsráðandi tískusamfélag Íslands."

Um Eitur fyrir byrjendur eftir Eirík Örn Norðdahl segir hann m.a.: "Stundum er minna meira og hin hálf-mínímalíska frásögn sögumanns af sambúðinni við vinkonu sína dansar vel hina fínu línu á milli þess að vera of ýkt og að vera ekki nógu ítarleg. [...] Textinn hér er einfaldlega frábær og ég verð að viðurkenna að það eru ekki margar íslenskar skáldsögur á þessum áratug sem ég man eftir sem standa Eitrinu jafnfætis í þeim efnum. [...] Eitt óborganlegasta atriði sem ég hef lesið í íslenskum skáldskap í lengri tíma er að finna í þessari bók, þar sem lætin í parinu eru að æra Halldór sem leitar sér hugarafdreps í að fylgjast með sprungum í loftinu frammí stofu. Það atriði, vopnað frábærum prósa Eiríks Arnar, er algjört dúndur."

Um Fenrisúlf eftir Bjarna Klemenz segir Kristján Atli þá m.a.: "Sagan er ótrúlega flæðandi og prósinn gríðarlega ríkur - hjá Bjarna, ólíkt Hauki Má og Eiríki Erni, er meira vissulega meira - og sagan sjálf minnti mig um margt á bækurnar Neverwhere og American Gods eftir Neil Gaiman, en eins og hann blandar Bjarni nútímanum og goðsögnum saman á nýstárlegan og ferskan hátt.
Þessi bók er einfaldlega ótrúlega ríkuleg, hvort sem litið er á prósann eða söguna. [...] Ef hann getur skrifað svona góða skáldsögu í fyrstu tilraun verður spennandi að sjá hvað hann gerir næst."

Umfjöllun Kristjáns Atla er hægt að lesa í heild sinni á heimasíðu hans.

Bækurnar má meðal annars kaupa á www.eymundsson.is, www.boksala.is, www.baekur.is, og www.haraldur.is. Þá er þær að sjálfsögðu að finna í öllum bókabúðum sem standa undir nafni.

Óttar áritar Hannes

Á morgun, laugardaginn 16. des., mun Óttar M. Norðfjörð árita nýútkomna ævisögu sína, Hannes - Nóttin er blá, mamma í bókabúð Máls og menningar á Laugarveginum.

Fyrsta bindi þessa meistaraverks hefur verið í efsta sæti metsölulistans í flokki ævisagna, handbóka og fræðirita nokkrar vikur í röð. Og í öðru sæti á sama lista yfir alla flokka, hársbreidd á eftir Konungsbók eftir Arnald Indriðason.

Áritunin hefst kl. 14.00 og eru allir velkomnir.

Af ósviknum meistaraverkum, nautnum og viðtölum

Á vef Eymundsson er hægt að setja inn umsagnir um þær bækur sem eru til sölu. Þar má meðal annars lesa dóma lesenda um bækurnar Hannes - nóttin er blá, mamma eftir Óttar Martin Norðfjörð og Eitur fyrir byrjendur eftir Eirík Örn Norðdahl. Um þá fyrrnefndu segir einn lesenda einfaldlega: "Ósvikið meistaraverk". Bóksalinn Kristján Freyr Halldórsson segir Eitur fyrir byrjendur vera frábæra bók: "Bók Eiríks kemur inná margar tilfinningar, yfir lestrinum má bæði hlæja og gráta. Eiríkur skrifar mjög vel og maður líður áfram um lipran textann og erfitt var að leggja frá sér bókina. Frábærir dómar um hana koma ekki á óvart."

Nýhil vill hvetja fólk til að nýta sér möguleikann til að skrifa umsagnir um bækur á vef Eymundsson.

Kristján er ekki einn um að þykja mikið til Eiturs fyrir byrjendur koma. Rithöfundurinn og smásagnaskáldið Ágúst Borgþór treinir sér bókina þessa dagana og les fáeinar síður á dag. Á bloggi sínu segir hann m.a.: "Algjörlega óumbeðinn er ég að glugga í Eitur fyrir byrjendur. Ég fór upp að síðu 40 áðan. Það var nánast nautn. Flottur stíll, draumkennt andrúmsloft, ófyrirsjáanleiki. Þrælgóður texti."

Eiríkur Örn ræddi bókina við Víðsjá í gær, og má hlusta á það viðtal á vef RÚV.

Þá ræddi Viðar Þorsteinsson, útgáfustjóri Nýhils, um forlagið, félagið og félagaforlagið í Vítt og breitt í gær.

Nýhil í portrettum á Borgarbókasafni

SKRÁSETNING KYNSLÓÐAR í Borgarbókasafninu – Björn M. Sigurjónsson sýnir ljósmyndir af skáldum Nýhils í Borgarbókasafni, Grófarhúsi.
Ljósmyndasýningin „Skrásetning kynslóðar“ opnar í Borgarbókasafninu í Grófarhúsi 15. desember kl. 17.00. Þar sýnir Björn M. Sigurjónsson portrett af ungum íslenskum rithöfundum og listamönnum. Allt eru þetta höfundar sem hafa gefið út undir merkjum Nýhils, en eiga það jafnframt sammerkt að hafa vakið athygli fyrir framsækna og nýja sýn í listsköpun sinni. Myndirnar eru teknar í vistkerfum skáldanna – á heimilum þeirra, þar sem sköpunarverkin verða til.
Á opnun sýningarinnar verður dagatal fyrir árið 2007 með úrvali sömu ljósmynda kynnt. Þá munu skáldin lesa upp úr nýlegum verkum sínum. Þetta er önnur einkasýning Björns á þessu ári og í þriðja sinn sem hann sýnir myndir sínar opinberlega. Sýningin er opin á opnunartíma Borgarbókasafnsins fram í janúar.
Nánari upplýsingar veita Viðar í s. 6954280 og Björn í síma 8940720.

Eitur fyrir byrjendur: „gríðarlega vel skrifuð“

Eitur fyrir byrjendur eftir Eirík Örn Norðdahl hefur hlotið einstaklega góðar viðtökur gagnrýnenda líkt og tíundað hefur verið hér á blogginu, og nú síðast í DV 8. desember. Sigríður Albertsdótti ritar þar mjög lofsamlegan dóm og segir m.a.:
„Eitur fyrir byrjendur … er saga sem tekur verulega á taugarnar og því tæpast fyrir viðkvæmar sálir enda vílar Eiríkur Örn ekki fyrir sér að skyggnast inn í myrkustu hugskot mannsins og draga þaðan út alls kyns sora og perragang. En sagan er gríðarlega vel skrifuð … Í Hugsjónadruslunni sýndi Eiríkur Örn Norðdahl snilldartakta en bætir hér um betur og sýnir svo ekki verður um villst að hann er höfundur sem er kominn til að vera.“

Bloggað um bækur og ó-bækur

Talsvert er bloggað um fyrsta bindi ævisögu Hannesar Hólmsteins Gissurarson eftir Óttar Martin Norðfjörð, Hannes - Nóttin er blá, mamma, einkum í ljósi yfirstandandi klögunarmáls Nýhils á hendur Eddu útgáfu og umræðu sem spunnist hefur um hvort bókin sé í raun bók. Hinn aðsópsmikli bloggari og rithöfundur Ágúst Borgþór Stefánsson hefur þetta að segja: "Þeim [Nýhil] nægir ekki að láta þennan ævisögubrandara standa sem slíkan heldur teygja hann á langinn með frekar idjótískum kvörtunum og kærumálum."
Guðmundur Magnússon sagnfræðingur og ritstjóri tekur hins vegar undir með Lesbók Morgunblaðsins og segir að skilgreining bókar sé undirorpin vilja höfundarins, að ljóð sé það sem ljóðskáld segi að sé ljóð, að bók sé það sem bókarhöfundur segir að sé ljóð.
Nýhil fagnar umræðunni um hvað sé bók, og leggur nú á ráðin um málþing í samstarfi við Samtök Iðnaðarins, Prenttæknistofnun og Heimspekistofnun Háskóla Íslands þar sem spurningin verður rædd í pallborði af sérfræðingum. Bent skal á að klaga Nýhils á hendur Eddu snýst þó ekki um skilgreininguna á bók, heldur rangfærslur í auglýsingum varðandi metsölulista sem Hannes var óneitanlega efstur á.

Nýhil sendir erindi til Neytendastofu

Nýhil hefur sent svohljóðandi bréf til Neytendastofu:

Reykjavík, 6. desember 2006

Til: Neytendastofu

Nýhil áhugamannafélag (kt. 580203-3960) sendir eftirtalið erindi til Neytendastofu og leitar eftir ákvörðun hennar vegna framferðis Eddu-útgáfu hf (kt. 710800-3590).

Í Fréttablaðinu 3. desember sl. birti Edda opnuauglýsingu undir fyrirsögninni ‘Vinsælustu bækurnar’. Eru þar nokkrar bækur forlagsins kynntar og sæti þeirra á metsölulistum Morgunblaðsins og/eða sölulista Pennans-Eymundsson og Bókabóða MM tíundaður. Í tilfelli einnar bókar (Ljósið í djúpinu e. Reyni Traustason) er sæti ekki tilgreint heldur er eftirfarandi texti settur í staðinn:

„Mest selda bókin í flokki ævisagna samkvæmt metsölulistum.“
(Sjá mynd.)

Nýhil gerir alvarlega athugasemd við þennan auglýsingatexta þar eð mest selda bókin í flokki ævisagna samkvæmt þeim tveimur metsölulistum sem voru nýbirtir á þessum tíma er alls ekki umrædd bók heldur er það bókin Hannes – nóttin er blá mamma eftir Óttar Martin Norðfjörð sem gefin er út af Nýhil. (Sjá mynd).

Þann 6. desemeber hafði útgáfustjóri Nýhils samband við kynningarstjóra Eddu og leitaði skýringa á þessum fullyrðingum. Þær einu skýringar voru gefnar að kynningarstjórinn teldi Hannes – nóttin er blá, mamma ekki sambærilega við bækur Eddu og að Edda réði því hvað og hvernig hún auglýsti. Ekkert kom fram í samtalinu sem benti til þess að vitnað hefði verið til metsölulista annarra en þeirra þar sem Hannes – nóttin er blá, mamma er sannarlega talin mest selda ævisagan.

Nýhil telur hér um að ræða brot á 6. grein laga um eftirlit með óréttmætum viðskiptaháttum og gagnsæi markaðarins (2005 nr. 57 20. maí) – enda hafi „rangar, ófullnægjandi eða villandi upplýsingar í auglýsingum“ verið veittar með því að annað hvort vitna til metsölulista sem ekki eru til eða fara vísitandi rangt með ótvíræðar niðurstöður þeirra metsölulista bóka sem í umferð eru.

Nýhil fer þó aðeins fram á að Edda – útgáfa birti leiðréttingu á umræddri auglýsingu í þeim fjölmiðlum þar sem hún birtist og biðji höfund og útgefanda Hannesar – nóttin er blá, mamma opinberlega afsökunar.


Fyrir hönd Nýhils,

___________________________
Viðar Þorsteinsson, útgáfustjóri

Þögnin rofin

Blaðamaðurinn og ritstjóri Menntaskólablaðsins Verðandi, Sindri Freyr Steinsson, tók viðtal við ævisagnaritarann Óttar M. Norðfjörð í nýjasta hefti blaðsins. Þar kemur margt nýtt og skemmtilegt fram, meðal annars vangaveltur Hannesar Hólmsteins Gissurssonar um nýútkomna ævisögu, en Sindri leitaði til hans vegna viðtalsins. Aðspurður um ævisöguritun Óttars sagði Hannes :

"Ég hef nákvæmlega ekkert við það að athuga, að Óttar M. Norðfjörð gefi út þennan fjölritaða bækling um mig. Það hafa aðrir gefið slíka fjölritaðabæklinga út áður, þótt þeir hafi af einhverjum ástæðum ekki fengið bókabúðir til að selja þær fyrir sig. Ég tel, að oft hafi verið valin ómerkilegri viðfangsefni í bókum! Ég myndi líka hafa ágætan húmor fyrir framtakinu, ef þessi bæklingur væri skrifaður af húmor, en svo er því miður ekki. En ég óska Óttari alls góðs á rithöfundarbrautinni, þótt fyrstu skrefin hafi eftil vill ekki verið mjög örugg."

Já, þögnin er svo sannarlega rofin og ekki ber á öðru en að Hannes taki uppátækinu bara vel. Það má svo sem hnýta í tal Hannesar um bókina sem "bækling" en Nýhil fyrirgefur það.

Þess má geta að Menntaskólablaðið Verðandi er fríblað og dreift um alla framhaldsskóla landsins og það fer líka í almenna fríblaðadreifingu á höfuðborgarsvæðinu, á kaffihúsum og fleiri almenningsstöðum.

„Tekst ótrúlega vel að tvinna þjáningu þessara persóna saman“

Bjarky Valtýsson skrifar dóm um Eitur fyrir byrjendur eftir Eirík Örn Norðdahl á vefritið Vettvang. Bjarki er að vonum harla ánægður með bókina, líkt og aðrir gagnrýnendur hafa verið, og segir meðal annars: „Eiríki tekst ótrúlega vel að tvinna þjáningu þessara persóna saman, og hann gerir það oft með því að setja þær í undarlegar aðstæður þar sem öfgar mætast, og maður bíður spenntur eftir viðbrögðum.“

Dóminn í heild sinni er hægt að lesa á vefritinu Vettvangur.

Bókina er hægt að versla með því að smella hér.

Hannes uppseld

Fyrsta upplag ævisögu Hannesar Hólmsteins Gissurssonar, Hannes -Nóttin er blá, mamma, er uppselt hjá útgefenda, en áhugi almennings ábókinni hefur farið fram úr björtustu vonum. Enn eru til einhver eintök í nokkrum bókabúðum, en fjölmargar búðir bíða nú eftir eintökum af bókinni.

Þess má geta í framhaldi að bókin er komin í fyrsta sæti yfir mest seldu ævisögur, handbækur og fræðibækur í Pennanum-Eymundsson og bókabúð Máls og menningar, og í annað sæti yfir mest seldu bækur íöllum flokkum, hársbreidd á eftir Konungsbók eftir Arnald Indriðason.

Von er á öðru upplagi bókarinnar á næstunni.

Hannes í fyrsta sæti!

Þær gleðifréttir hafa borist Nýhil að fyrsta bindi í ævisögu Hannesar Hólmsteins Gissurssonar, Hannes - Nóttin er blá, mamma, er komið í fyrsta sæti metsölulistans í Pennanum Eymundsson og Bókabúð Máls og menningar í flokknum handbækur/fræðibækur/ævisögur. Listinn er gerður út frá sölu dagana 22.11.06 - 28.11.06.

Og það er ekkert lát á gleðifréttunum hjá Nýhil, því á listanum yfir mest seldu bækur í öllum flokkum er bókin komin í annað sæti! Í fyrsta sæti er Konungsbók eftir Arnald Indriðason, fjórðu vikuna í röð, en Hannes sækir fast að honum og tekst jafnvel að steypa henni af stóli í næstu viku ef fram fer sem horfir.

Það verður gaman að sjá hvernig bókinni reiðir af á metsölulistanum sem Morgunblaðið birtir á næstunni.

Eitur fyrir byrjendur fær þrjár og hálfa stjörnu í Kastljósi

Eitur
fyrir byrjendur eftir Eirík Örn Norðdahl hlaut rífandi góðan dóm hjá
Jóni Yngva Jóhannssyni, gagnrýnanda Kastljóssins, fyrr í kvöld. Ýmsum af
virtustu höfundum þjóðarinnar var skotinn refur fyrir rass, því Eiríki voru
útdeildar þrjár og hálf stjarna af hinum mikilsvirta gagnrýnanda, sem er harla
gott. Sjáið undrið með eigin
augum!

Hannes hafnar Hannesi

Samkvæmt áreiðanlegum heimildarmanni Nýhil sást til félaganna Gísla Marteins Baldurssonar og Hannesar Hólmsteins Gissurarsonar í Pennanum-Eymundsson í Austurstræti fyrir örfáum dögum. Grínistinn Gísli Marteinn ákvað þá að bregða á leik og keypti því eintak af fyrsta bindi ævisögu Hannesar, Hannes - Nóttin er blá, mamma og hugðist gefa bláklædda hugmyndafræðingnum. Hannes neitaði hins vegar að þiggja gjöfina!

Þess ber þó að geta að ævisöguritari Hannesar, Óttar M. Norðfjörð, sendi Hannesi eintak af bókinni í síðustu viku, svo ef til vill þáði hann ekki gjöfina sökum þess að hann á nú þegar eintak.

Ekki er vitað um afdrif eintaksins sem Gísli Marteinn keypti handa lærimeistara sínum.

Bókahönnun Nýhils prísuð af einvalaliði sérfræðinga

Fréttablaðið birtir í dag úttekt á gæðum bókahönnunar í jólabókaflóðinu. Óhætt er að segja að Nýhil komi vel út úr samanburðinum, þar eð Eitur fyrir byrjendur eftir Eirík Örn Norðdahl lendir í 2. sæti. Lofsamlegum orðum er farið um jólaútgáfu Nýhils í heild, m.a. með þessum orðum: „Nýhil-útgáfan skarar augljóslega fram úr samkeppnisaðilum í útgáfu hvað varðar hönnun bókarkápa í ár. Hver bókin frá Nýhil er annarri fegurri …“. Jafnramt segist einn álitsgjafi „alveg eins geta nefnt Svavar Pétur og 20. öldina“ og Eitur fyrir byrjendur.
Í hópi álitsgjafa Fráttablaðsins voru Bryndís Loftsdóttir hjá Pennanum-Eymundsson, Egill Helgason sjónvarpsmaður og Guðmundur Oddur Magnússon hönnunarprófessor.
Una Lorenzen á heiðurinn af hönnun bókanna tveggja sem nefndar voru auk Fenrisúlfs eftir Bjarna Klemenz. Allir þrír titlarnir voru prentaðir hjá prentsmiðjunni Odda en með þeim var einmitt ýtt úr vör samstarfi Nýhils og Odda um framsækna bókagerð, sem óhætt að segja að hefjist með stæl.

Birta mælir með Svavari Pétri

Fylgirit Fréttablaðsins um ástina og lífið, Birta, mælir í dag með skáldsögunni Svavar Pétur og 20. öldin eftir Hauk Má Helgason. Nýhil tekur hjartanlega undir þau meðmæli og bendir áhugasömum á að festa kaup á bókinni t.d. hér, en annars í nánast hvaða bókabúð sem er.

Hannes í 4. sæti!

Hannes heldur áfram að klifra upp metsölulistana. Á bóksölulista Morgunblaðsins, sem Félagsvísindastofnun tók saman 15-21 nóv. og birtist í dag, er ævisagan komin í 4. sæti í flokki ævisagna og endurminninga.

Bóksölulisti Morgunblaðsins er helsti metsölulisti bókajólanna og byggir á sölutölum frá bókabúðum út um allt land, sem og verslunum á borð við Hagkaup og Nettó. Árangur Hannesar er því einkar glæsilegur, enda fæst hún aðeins í tveimur búðum, Mál og menningu á Laugavegi og Pennanum-Eymundsson í Austurstræti. Eins og áður hefur komið fram kostar hún litlar 99 kr.

"Ég hef hlegið af mér rassgatið!"

Þórunn Hrefna Sigurjónsdóttir, ævisagnaritari og bókagagnrýnandi Víðsjár, er "mikilvirkur bloggari", eins og kallað er. Á síðu hennar, Dagbók Tótu Pönk, segir Þórunn m.a. frá því að hún hafi nýverið lokið við fyrsta bindi ævisögu Hannessar Hólmsteins: Hannes - Nóttin er blá, mamma, og fer um hana fjarska fallegum orðum. "Ég hef verið að lesa Ævisögu Hannesar Hólmsteins eftir Óttar M. Norðfjörð og ég hef hlegið af mér rassgatið! Svo er pilturinn svo góður að hann selur eintakið á 99 krónur og Mæðrastyrksnefnd fær allan ágóða. Þessi efnismikla og góða bók fer sko í alla jólapakka frá mér!"

Hannes - nóttin er blá, mamma er gefin út af Nýhil og fæst aðeins í Eymundsson á Austurstræti og Bókabúð Máls og menningar á Laugavegi. Leiðbeinandi verð er 99 krónur, og líkt og kemur fram í orðum Þórunnar Hrefnu rennur allur ágóði til Mæðrastyrksnefndar.

Víðsjá og Ólafur Egill um Nýhils-bækur

Leikarinn knái Ólafur Egill Egilsson er einn af þeim sem hafa þegar lesið Eitur fyrir byrjendur eftir Eirík Örn Norðdahl. Á myndinni má sjá ummæli hans þar um, tekin úr Blaðinu 22. nóvember sl.
Í Víðsjá birtist á dögunum úttekt Þórunnar Hrefnu Baldvinsdóttur um Svavar Pétur og 20. öldina, og hefur hann nú verið birtur á vefsíðu RÚV. Skulu allir hvattir til að lesa hann hér.

Hannes strax í 9. sæti!

Landsmenn hafa augljóslega beðið spenntir eftir fyrsta bindi ævisögu Hannesar Hólmsteins Gissurssonar, Hannes - Nóttin er blá, mamma. Bókin kom í búðir seinnipart mánudags (20. nóv) og á metsölulistanum sem gerður er út frá sölu dagana 15.11-21.11. í Pennanum Eymundsson og Bókabúð Máls og menningar rauk hún beint í 9. sætið yfir handbækur, fræðibækur og ævisögur! Það verður því mjög spennandi að sjá hvernig bókinni vegnar í næstu viku, en miðað við þessar fyrstu tölur má reikna með því að hún klifri allverulega upp listann.

Þess má geta að Hannes - Nóttin er blá, mamma fæst aðeins í bókabúð Mál og menningar á Laugavegi og Pennanum-Eymundsson í Austurstræti. Hún kostar litlar 99 kr. og allur ágóði hennar rennur til Mæðrastyrksnefndar.

AÁBCDÐEÉFGHIÍJKLMN- OÓPQRSTUÚVWXYÝZÞÆÖ

Nýhil kynnir:
AÁBCDÐEÉFGHIÍJKLMNOÓPQRSTUÚVWXYÝZÞÆÖ eftir Óttar M. Norðfjörð.

AÁBCDÐEÉFGHIÍJKLMNOÓPQRSTUÚVWXYÝZÞÆÖ er frumleg ljóðabók þar semreynt er til hins ítrasta á íslenska tungumálið. Öll orðin í bókinnieru í stafrófsröð, frá fyrsta orði í fyrsta ljóði til síðasta orðs ísíðasta ljóði, og í hverjum kafla er einungis stuðst við orð sembyrja á sama bókstaf. Niðurstaðan er stórskemmtileg ljóðabók semfjallar um allt á milli himins og jarðar, skrifuð á nýstárlegutungumáli sem minnir einna helst á tónlist.

Óttar M. Norðfjörð hefur áður gefið út ljóðabækurnar Grillveður í október, Sirkus, Gula bókin og Gleði og glötun hjá Nýhil og skáldsöguna Barnagælur hjá Mál og menningu. Fyrir örfáum dögum kom einnig út fyrsta bindi í ævisögu Hannesar Hólmsteins Gissurarsonar – Hannes: Nóttin er blá, mamma.

Sýnishorn úr bókinni:

E.
Einusinnivar einvalalið einvaldsherra, einvörðungu Eista.Eitilharðir, eitthundrað eitthvað ekkjumenn. Ekklarnir eldgamlir,eldhressir eldhugar. Eldrauðir ellilífeyrisþegarnir elliæru elskuðuendasprettinn. Endaþarmarnir endingargóðir, endurlífganirnarendurteknar, engin ennþá erfðabreyttur. Erfiðasta ergelsið eróbikkið,ertingin espaði Evrópumennina.

AÁBCDÐEÉFGHIÍJKLMNOÓPQRSTUÚVWXYÝZÞÆÖ e. Óttar Martin Norðfjörð 58bls. 1.500 kr ISBN 9979-9581-5-6Nánari upplýsingar hjá höfundi í síma 866 9276 netf. ottarmn@gmail.com

Fenrisúlfur dæmdur í Lesbók: dauði, dulúð, eyðilegging, myrkur og kuldi

Ólafur Guðsteinn Kristjánsson ritar gagnrýni um Fenrisúlf Bjarna Klemenzar í Lesbók Morgunblaðsins í dag. Dómurinn er frekar jákvæður og segir Ólafur Guðsteinn m.a. þetta: "Textinn er að mestu leyti vel úr garði gerður, agaður og tekst að skapa spennu sem heldur lesandanum við efnið allt til loka."
Fenrisúlf má kaupa hér.

Arnaldur Máni um Ljóðahátíð Nýhils

"Samkoma nýhilja, alþjóðleg nota bene, ljóðahátíð á stúdentakjallaranum" er umfjöllunarefni Arnaldar Mána í stórskemmtilegum pistli á Kistunni. Lesið pistilinn hér.

Eitur fyrir byrjendur: „grípandi og endalokin óvænt“

Í Morgunblaði dagsins ritar Þórdís Gísladóttir gagnrýni um eitt af jólaflaggskipum Nýhils, Eitur fyrir byrjendur eftir Eirík Örn Norðdahl. Hún segir m.a.: „Bókin er grípandi og endalokin óvænt og ekki endilega augljós. … Eitur fyrir byrjendur er ekki stór bók en hún fjallar um mikilvæga atburði. Sagan býður upp á áhugaverðar vangaveltur um sambönd og sektarkennd og áhrif fortíðar á nútíð. … Eitur fyrir byrjendur er athyglisverð skáldsaga.“
Dóminn í heild sinni má lesa með því að næla sér í eintak af Morgunblaðinu, en Eitur fyrir byrjendur má eignast með því að smella hér. Þess má jafnframt til gamans geta að Sigurjón Þórðarson þingmaður Frjálslynda flokksins gerir meintar líkamsmeiðingar sama rithöfundar að umtalsefni í Blaðinu í dag, sem lesa má hér.

Oddi og Nýhil undirrita samning

Prentsmiðjan Oddi og Nýhil hafa gert með sér sögulegan þriggja ára samstarfssamning. Samningurinn snýst um að leita leiða í óhefðbundnum frágangi á prentverki og er samstafinu ýtt úr vör með prentun á þremur jólaskáldsögum Nýhils en þær eru Fenrisúlfur eftir Bjarna Klemens, Eitur fyrir byrjendur eftir Eirík Örn Norðdahl og Svavar Pétur og 20. öldin eftir Hauk Má Helgason. Lesa má fréttatilkynninguna í heild sinni hér, en Nýhil lýsir yfir almennum fögnuði og tilhlökkun vegna undirritunarinnar, auk þakklætis. Á myndinni má sjá Viðar Þorsteinssson útgáfustjóra Nýhils og Jón Jósafat Björnsson framkvæmdastjóra Odda, en á milli sín hafa þeir bók sem er innbundin í skyrtu áþekka þeirri sem útgáfustjórinn klæðist, glæsilegt dæmi um framsækna bókagerð!

Svavar Pétur og 20. öldin jólabókin í ár?

Blaðið leitar álits fjögurra einstaklinga um 'jólabókina í ár' í Jólablaði sínu og er einn þeirra ljóðskáldið unga Arngrímur Vídalín. Hann er ekki seinn á sér að nefna til sögunnar eina af jólabókum Nýhils, og viðhefur þau orð: "Það er ekki hægt að standast annan eins söguþráð og birtist í skáldsögunni Svavari Pétri og 20. öldinni, eftir Hauk Má Helgason. Bankastarfsmaður sem fenginn er til að stilla líki Johns Lennon upp í skemmtigarði í Kópavoginum til að hylla 20. öldina, en ræður ekki við afleiðingarnar. Þetta er skemmtilega firrtur gjörningur og hvergi er spurt um siðferði, en eins og LoveStar sýndi fram á um árið veit maður aldrei hvenær skáldskapurinn getur orðið að veruleika."
Arngrímur er því á öndverðum meiði við Úlfhildi Dagsdóttur, gagnrýnanda Bókmenntavefjarins, sem sárnar að höfundur Svavars Pétur útskýri kenningar franska hugsuðarðins Baudrillards 'of vandlega'.
Kaupið Svavar Pétur og 20. öldina hér.

Dagskrá ljóðahátíðar

Í kvöld kl. 20 hefst glæsileg dagskrá ljóðahátíðar Nýhils í Stúdentakjallaranum, og heldur hún svo áfram fram á annað kvöld. Á morgun verður málþing í Norræna húsinu kl. 12 á hádegi, sem stendur til 15, og upplestur frá 16-18. Um kvöldið heldur gamanið svo áfram í Stúdentakjallaranum, og hefst sú dagskrá kl. 20. Hér að neðan er dagskrá fyrir viðburðina tvo í Norræna húsinu - og birtist hún með fyrirvara um breytingar.

Dagskrá/ Program

Föstudagur/ Friday

20.00 Þórdís Björnsdóttir
20.15 Ingólfur Gíslason
20.30 Jesse Ball
20.45 Leevi Lehto
21.05 Ófeigur Sigurðsson
21.20 Ingibjörg Magnadóttir
21.35 Gunnar Wærness
21.55 Homebreakers
22.15 Valur Brynjar Antonsson
22.35 Katie Degentesh
22.55 Kristín Eiríksdóttir
23.15 Birgitta Jónsdóttir
23.35 Kenneth Goldsmith
23.55 Berglind Ágústsdóttir
00.15 Matti Pentikäinen
00.35 Skakkamanage


Laugardagur/ Friday

20.00 Bjarni Klemenz
20.15 Stórsveit Áræðis
20.35 Jane Thompson
20.55 Haukur Már Helgason
21.10 Óttar Martin Norðfjörð
21.30 Derek Beaulieu
21.50 Donna Mess
22.10 Kristín Svava Tómasdóttir
22.25 Jörgen Gassilewski
22.45 Þórunn Erlu Valdimarsdóttir
23.05 Anna Hallberg
23.25 Eiríkur Örn Norðdahl/ Halldór Arnar Úlfarsson
23.45 Kabarettinn Músifölsk
00.05 Christian Bök
00.25 Reykjavík!

Dómar felldir

Dómar hafa verið felldir um skáldsögu Hauks Más Helgasonar, Svavar Pétur og 20. öldin. Ritdómari Kistunnar, Arnaldur Máni Finnsson, segist sjaldan hafa lesið jafn "heilbrigðar lýsingar á kostum peninga" en gefur skáldsögunni almennt plús í kladdann, óskar bæði höfundi og Nýhil til hamingju. Nýhil þakkar fyrir sig og roðnar upp að hársrótum! Dóminn má lesa í heild sinni hér.
Samkvæmt Birni Þór Vilhjálmssyni á Morgunblaðinu "umfaðmar" Svavar Pétur og 20. öldin "svokallaðan póstmódernisma í bókmenntum og gerir sér ennfremur mat úr … kenningum og hugmyndum þessarar stefnu." Verkið spyrji "samtímann ákveðinna spurninga", en "einkum er ímyndasamfélagið yfirheyrt". Björn, sem er nokkuð tvíbentur og tvíeggjaður í dómi sínum, lætur nægja að gefa í skyn að þetta metnaðarfulla verkefni hafi heppnast, en gerir þess í stað athugasemdir við skemmtigildi verksins og líkir því við blogg. Dóminn má ekki lesa nema í prentaðri útgáfu Morgunblaðsins.

Jólabókaflóð Nýhils á Súfistanum

Hinir mikilúðlegu skáldsagnahöfundar Nýhils munu miðvikudagskvöldið 8. nóvember lesa upp í hjarta íslenskrar bókmenningar, í sjálfri Bókabúð Máls og menningar á Laugavegi. Hér er að sjálfsögðu um að ræða þá herrans menn Bjarna Klemenz, sem kynnir Fenrisúlf, Eirík Örn Norðdahl, sem kynnir Eitur fyrir byrjendur, og Hauk Má Helgason, sem kynnir Svavar Pétur og 20. öldin. Á þeim fáu dögum sem liðið hafa frá útgáfu bókanna hafa þær vakið gríðarjákvæð viðbrögð íslenskra bóklesenda.

Fenrisúlfur Bjarna Klemenzar lofaður í bloggheimum

Bloggarinn Valþór skýtur atvinnu-gagnrýnendum ref fyrir rass og er fyrri til að veita Fenrisúlfi Bjarna Klemensar umsögn. Hann segist "stórhrifinn" af þessari jólaskáldsögu Nýhils -- en lesið alla álitsgjörðina hér. Allar jólaskáldsögur Nýhils eru nú fáanlegar í bókaverslunum á höfuðborgarsvæðinu.

Svavar Pétur í bloggheimum og á RÚV

Svavar Pétur á sinni 20. öld hefur tekið að sigla um úthöf nets og ljósvaka. Bloggarinn Björn Flóki sem skrifar á valinkunnurandandsmadur.blogspot.com segir skemmtilega frá viðkynningu sinni af Svavari Pétri, hér.
Guðni Tómasson, hinn aðsópsmikli þáttastjórnandi Víðsjár, spjallaði svo við Hauk Má, höfund Svavars Péturs og 20. aldarinnar, hér.

Viðar Þorsteinsson svarar Önnu Björk Einarsdóttur

Lesa má svar Viðars Þorsteinssonar við grein Önnu Björk Einarsdóttur þar sem drepið er á kaup Landsbankans á 130 ljóðabókum Nýhils, hér. Fylgist spennt með ritdeilunni!