Um Nýhilkvöldið í Þjóðleikhúskjallaranum

http://10000tw.blogspot.com/2006/09/ljapart-nhils-g-var-alltof-fullur.html

Spjallað við Þórdísi í Víðsjá

Í tilefni af útkomu bókarinnar Vera & Linus eftir Jesse Ball og Þórdísi Björnsdóttur tók Víðsjá viðtal við þá síðarnefndu. Þar segir Þórdís frá tilurð bókarinnar í léttu spjalli við hinn geðþekka Hauk Ingvarsson, auk þess sem hún les upp úr verkinu. Viðtalið má hlusta á hér. Nýhil minnir á að Þórdís og Jesse lesa upp úr Veru & Linus í Þjóðleikhúskjallaranum fimmtudagskvöldið 7. september.

Sumarútgáfu Nýhils fagnað

Í sumar hafa sjö nýir titlar frá Nýhil litið dagsins ljós. Um er að ræða prósaverk á ensku, Vera & Linus, eftir Jesse Ball og Þórdísi Björnsdóttur, ljóðabókina Barkakýli úr tré eftir Þorstein Guðmundsson, og seinni bækurnar fimm í bókaflokkinum ‘Norrænar bókmenntir’, en þær eru Roði (e. Ófeig Sigurðsson), Húðlit auðnin (e. Kristínu Eiríksdóttur), Og svo kom nóttin (e. Þórdísi Björnsdóttur), Eðalog (e. Val Brynjar Antonsson) og Litli kall strikes again (e. Steinar Braga).

Nýhil hyggst minna rækilega á kraftmikla útgáfu sumarsins með upplestrarkvöldi í Þjóðleikhúskjallaranum fimmtudagskvöldið 7. september næstkomandi. Skáldin munu lesa úr nýútkomnum verkum auk þess sem frekari útgáfa haustsins verður kynnt. Söngkonan blíða Lay Low léttir lund á milli atriða og auðvelt verður að nálgast hressingar á barnum. Húsið opnar klukkan 20:00 en dagskrá hefst um 20:30.

Nánari upplýsingar: Viðar Þorsteinsson útgáfustjóri Nýhils, vidart@hi.is, s. 695 4280 og Þór Steinarsson, steinarsson@gmail.com, s. 692 0979

Barkakýli úr tré

Út er komin ljóðabókin Barkakýli úr tré eftir Þorstein Guðmundsson grínista og rithöfund. Í henni er að finna yfir 100 einföld og stutt ljóð í anda þess fáránleika og þeirrar undirfurðulegu sýnar á hversdaginn sem hann er þekktur fyrir. Viðfangsefni Þorsteins eru margvísleg, allt frá Napóleon til Vinstri-grænna, frá bensínafgreiðslumönnum til gamla mannsins sem stofnaði Garðabæ. Bókin er kilja í vasabókarbroti og fæst í nokkrum vel völdum verslunum á stór-Reykjavíkursvæðinu og á þeim dreifbýlisstöðum sem teljast þess virði að bjóða upp á ljóð en hana má einnig nálgast með því að senda skáldinu sjálfu vinsamlegt sendibréf. Verð bókarinnar er 1.890 kr. Útgefandi er Nýhil og Eiríkur Örn Norðdahl ljóðskáld ritar formála.

Nýhil rokkar í Bókaverslun Máls og menningar

Að Laugavegi 18 hefur um langt skeið staðið hús. Húsið var byggt fyrir blóðpeninga ógnarstjórnarinnar í Sovétríkjunum, en á íslandi voru kommúnistar fylgileppar og kvislingar þessa illa heimsveldis. En til þess að þeir gætu logið meira að fólki þá þurftu þeir að byggja hús til að selja lygar sínar í. Þá fengu þeir peninga frá Stalín og lygurum og morðingjum hans til að gera það.
Mánudaginn 21. ágúst tekur Nýhil þátt í dagskrá með fleirum (þ.á m. hljómsveitinni Fræ) sem byrjar klukkan 15:00 í Bókaverslun Máls og Menningar. Komið þangað.

Úlfhildur Dagsdóttir um Norrænar bókmenntir II

Á Bókmenntavefnum hefur nú birst ritdómur Úlfhildar Dagsdóttur um ljóðabækurnar fimm í seinna holli ljóðabókaseríunnar Norrænar bókmenntir. Úlfhildur segir "með þessari fimm bóka útgáfu hafa orðið nokkur bókmenntaleg tíðindi." Dóminn í heild sinni má lesa hér.

Vera & Linus í Reykjavík Mag

Í ágústlok gefur Nýhil út á Íslandi verkið 'Vera & Linus' eftir Jesse Ball og Þórdísi Björnsdóttur. Eilítinn forsmekk að dásemdunum má sjá í umfjöllun og viðtali sem birtist í Reykajvík Mag, hér.

Nýhil í Grapevine - Bezt í heimi!

Nýhilbúðinni auðnaðist á dögunum sá heiður að vera valin í "Bezt í heimi" í hinu öðla tímariti The Reykjavík Grapevine. Þar segir m.a. "Now, the Nýhil group has found a home for their work, taking over a sitting room in the Smekkleysa (Bad Taste) Record Shop and turning it into the poet’s sweetest dream. Perhaps surprising for people who have followed the group’s more gritty tendencies, the poetry shop is basically high end, featuring tome after tome, set into bookshelves and, in one of the salesperson’s own words, “The most expensive display case in the city.”" - Greinina má lesa í heild sinni hér. Þá má geta þess að á næstu vikum munu birtast ljóð eftir þá Nýhilista sem eiga bók í seríunni Norrænar Bókmenntir í Grapevine, og reið Eiríkur Örn Norðdahl á vaðið í síðasta blaði og má finna hans innlegg hér.

Myndin hér að ofan, sem sýnir þrusufólk í banastuði við opnun Nýhilbúðarinnar, var tekin af Helga J. Haukssyni.

Benedikt Hjartarson fjallar um Norrænar bókmenntir

Góðkunni framúrstefnufræðingurinn Benedikt Hjartarson hefur líklega glaðst öðrum mönnum meira yfir úgáfu Norrænna bókmennta, enda ekki á hverjum degi sem að stefnt er fram úr daufþykkum og daunillum samtíma íslensks skáldskapar.
Hann hefur nú tekið sama tvö erindi um seríuna sem flutt voru í Víðskjá og nálgast má hér: 1, 2.

Vessalingur minn

Lesið æsispennandi ritdeilu Magnúsar Þórs Snæbjörnssonar og Kristínar Eiríksdóttur á 10.000 tregawöttum.
Fyrsta innlegg Magnúsar, Vessapóesía, hér.
Svar Kristínar, Aparass, hér.
Andsvar Magnúsar, Hve gamall varð hann Adam, hér.

Lata stelpan

„Hitaveiturörin á veggnum gefa frá sér lágt, vinalegt suð og himneskan yl. Lötu stelpuna langar engan veginn að yfirgefa þessa tvo vingjarnlegu menn og rólegt andrúmsloftið. “ Svo segir í greinarkorni á hinu stórfína vefriti Lata Stelpan um yndislegustu bókabúð höfuðborgarsvæðisins, Ljóðabókaverzlun Nýhils í Kjörgarði (vingjarnlegu mennirnir eru Örvar Þór. Smár. og Þór St. Einarsson). Greinarkornið má lesa með því að smella hér. Lesendur eru þó beðnir um að vara sig á fullyrðingum um að Örvar Þóreyjarson Smárason, verzlunarstjóri, sé innkaupastjóri. Sjálfsagt má kenna gömlum þrjótsskap Örvars um þessa misfellu í framvindu sögunnar.

Ný sending í Nýhil-búð!

Kæru vinir, nær og fjær,
Nýhil tilkynnir hér með um nýja sendingu í Ljóðabókaverslun sína! Um er að ræða það sjóðheitasta og besta frá kanadíska ljóðaútgáfuframverðinum Coach House Press, og innifelur höfunda á borð við Christan Bök, Angelu Rawlings, bp Nichol, Sylviu Legris, Bruce Andrews, Derek Beaulieu og Jon-Paul Fiorentino. Bækurnar eru allar hóflega verðlagðar og bíða þess eins að rata í hendur opinmynntra ljóðaunnenda.
Ykkar,
Nýhil

Tandri Árdal: Af gefnu tilefni

(Greinin birtist í Morgunblaðinu laugardaginn 9. júní)
Það er ekki oft sem það gefst jafn skemmtilegt tækifæri til að bregðast við kalli um úrbætur eins og nú, þegar síður Morgunblaðsins hafa verið þaktar skrifum um þörf á góðum bókaverslunum í henni Reykjavík. Ólafur Stefánsson frá Syðri-Reykjum skrifar í gær, í tilefni af þörfum pistli skáldbróður míns Péturs Gunnarssonar, um hnignun kaupmennsku á sviði bókmennta í samtímaveruleika okkar. Vissulega hafa margir orðið til að benda á – einkum sín og milli og í einkasamtölum – að í óefni sé komið þegar ekki er lengur hægt að ramba inn í fallega bókabúð og láta þar fingur leika eftir rykföllnum kilinum á stórvirki einhvers af gömlu meisturunum.
Þannig er nútíminn – trunta, eins og einhver sagði! – að allt er á hverfanda hveli, og eitt tekur við af öðru. En þó er ekki öll von úti, því nýverið opnaði einmitt í miðbæ Reykjavíkur bókaverslun sem gefur fyrirheit um betri tíð. Ég er hér að sjálfsögðu að tala um Ljóðabókaverslun Nýhils, sem opnaði þann 23. maí í kjallaranum í Kjörgarði, Laugavegi 59. Ungu skáldin taka við þar sem okkur þá eldri brestur, og hafa svo sannarlega sýnt að þau eru föðubetrungar á fleiri en einu sviði. Í þessari ágætu ljóðabókabúð er að finna nánast allt það sem Ólafur lætur sig dreyma um – ‘notalegt umhverfi’, ‘fagfólk’ (já, ef ekki hreinlega starfandi rithöfunda, og þá ekki af verri endanum!) og sannkallaða, dulúðlega bókastemningu.
Ég vonast til að rekast á þá kumpána, Ólaf og Pétur, einhvern sólríkan eftirmiðdaginn í ljóðabókaverslun Nýhils, einu alvöru bókabúðinni í Reykjavík!
-- Tandri Árdal (Höfundur er ljóðskáld og fyrrv. léttvínsinnflytjandi)

Helgi J. Hauksson myndar Nýhil

Ljósmyndarinn Helgi J. Hauksson var meðal þeirra sem mætti á glæsilega opnun Ljóðabókaverzlunar Nýhils þann 20. maí síðastliðinn. Helgi beitti kubbnum af fádæma listfengi og nákvæmni, eins og hann á ættir til, og má nú sjá afrakstur þess á síðu Helga: http://www.bsh.is/Nyhil/. Á myndinni sem er hér til hliðar, sem er ein þeirra sem Helgi tók, má sjá þá Hauk Má Helgason, stofnfélaga í Nýhil og Þór Steinarsson, framkvæmdastjóra Nýhils, ræða eilífðina við listaskáldið vonda, Sigurð Pálsson.

Vídjóbókaljóðabúð

Get this video and more at MySpace.com
Þessi fallega búð var opnuð á laugardag.

Norrænar bókmenntir II

Nýhil kynnir! Titrandi af stolti! Norrænar bókmenntir II!

Um er að ræða síðara holl í ljóðabókaseríu Nýhils, fimm ljóðabækur frá jafn mörgum nýhilistum. Ónefnd bók eftir Þórdísi Björnsdóttur, Eðalog eftir Val Brynjar Antonsson, Húðlit auðnin eftir Kristínu Eiríksdóttur, Litli kall strikes again eftir Steinar Braga og Roði eftir Ófeig Sigurðsson.

Þá væri okkur mikil ánægja að sjá þig við opnun búðarinnar okkar næstkomandi laugardag, þar sem til sölu verða bækur Nýhils og annar varningur auk frábærs og áður óþekkts úrvals af ljóðum, innlendum og erlendum. Húsnæði verslunarinnar er að Laugavegi 59, í kjallara Kjörgarðs, inn af plötuverslun Smekkleysu. Opnunin stendur frá 16 til 18 og í boði verða léttar veitingar, ljúf skemmtiatriði og leiðinleg ræðuhöld. Búðin verður framvegis opin virka daga frá 14 til 18. Áskrifendur að Norrænum bókmenntum geta sótt eintök sín í búðina, og þeir sem það gera á laugardaginn fá safnljóðabók Nýhils Ást Æða Varps í kaupbæti. Aðrir áskrifendur fá svo seríuna senda heim. Þeir sem vilja kaupa sér áskrift að seríunni geta gert það í ljóðabókabúð Nýhils, eða með því að senda tölvupóst á nyhil@nyhil.org. Fyrri bækurnar fjórar í seríunni voru Gleði og glötun eftir Óttar Martin Norðfjörð, Rispa jeppa eftir Hauk Má Helgason, Blandarabrandarar eftir Eirík Örn Norðdahl og Gamall þrjótur, nýjir tímar eftir Örvar Þóreyjarson Smárason. Allar þessar níu bækur fást fyrir litlar 6.750 krónur.
Frekari upplýsingar er að fá hjá Þór Steinarssyni, framkvæmdastjóra Nýhils (692-0979) eða Örvari Þóreyjarsyni Smárasyni, verslunarstjóra Nýhils (869-3099).

Upplýsingar um skáldin:

Kristín Eiríksdóttir (1981-)


Kristín Eiríksdóttir er ljóðskáld og myndlistarmaður. Eftir hana liggur ljóðabókin Kjötbærinn, sem hún myndskreytti, og fjöldinn allur af myndlistarsýningum. Kristín hlaut fyrstu verðlaun í ljóðasamkeppni Eddu og Fréttablaðsins 2004.


Ófeigur Sigurðsson (1975-)


Ófeigur Sigurðsson er ljóðskáld, heimspekinemi og tónlistarmaður. Eftir hann liggja ljóðabækurnar Skál fyrir skammdeginu og Handlöngun, og skáldsagan Áferð.


Valur Brynjar Antonsson (1976-)


Valur Brynjar Antonsson er ljóðskáld. Hann lauk BA-prófi í heimspeki frá HÍ árið 2004. Eftir hann liggur ljóðabókin Ofurmennisþrá.


Steinar Bragi Guðmundsson (1975- )


Steinar Bragi Guðmundsson skrifaði ljóðabækurnar Ljúgðu Gosi, ljúgðu, Útgönguleiðir, Svarthol og Augnkúluvökvi og skáldsögurnar Áhyggjudúkkur; Sólskinsfólkið; og Turninn.


Þórdís Björnsdóttir (1978-)

Þórdís Björnsdóttir er ljóðskáld. Eftir hana liggur ljóðabókin Ást og appelsínu, sem meðal annars var sett á svið á Akureyri. Von er á samstarfsverkefni hennar og bandaríska ljóðskáldsins Jesse Ball, Vera & Linus, síðar á árinu.

Búðabókaljóðin!

Ástkærir vinir, fjölmiðlamógúlar, ættingjar, kunningjar, velgjörðarmenn, elskendur:

Þá er komið að því. Viðburður ársins. Fífldirfska Nýhils hefur náð nýjum hæðum, laugardaginn næstkomandi kl. 16 ýtir kompaní allífsins úr vör einhverri vitlausustu hugmynd íslenskrar viðskiptasögu: Ljóðabókabúð Nýhils verður ljóðsentrúm næsta árþúsunds, þar mun öld hins íslenska ljóðs ná sínu hæsta flugi, hálfkalkað af súrefnisleysi sleikir eldtungur sólarinnar og bros tunglsins. Ljóðvöllurinn er vígvöllur og liðhlaupar verða skotnir! Finni einhver meinbugi við þessum ráðahag Nýhils verður sá hinn sami skjátufleginn og kjöldreginn, héðan af verður ekki hopað, ekki hikað.

Ljóðabókabúðin opnar eins og áður segir kl. 16 laugardaginn 20. maí 2006, að Laugavegi 59 (Kjörgarði, inn af Smekkleysubúðinni). Nýhil vill bjóða öllum sínum elskulegu vinum að mæta og þiggja veitingar og fagna fullnaðarsigrinum með okkur. Þá verða stórfengleg ræðuhöld, Nýhilískir ljóðaupplestrar, harmonikkumúsík auk þess sem hljómsveitin Retro Stefson stígur á senuna. Samkoman stendur í tvo tíma, frá 16-18.

Fjölmiðlum er bent á að hafa samband við Þór Steinarsson, framkvæmdastjóra Nýhils (692-0979) eða Örvar Þóreyjarson Smárason, verslunarstjóra Nýhils (869-3099) til að fá frekari upplýsingar. Hægur leikur verður að fá að kíkja í búðina á fimmtudag eða föstudag með ljósmyndara eða upptökuvélar annars kyns, og er mönnum bent á að hafa einfaldlega samband og melda sig við einn af ofannefndum.

Ást og kossar,

Ykkar, að sjálfsögðu og eilífu,

Nýhil

Orðið tónlist – opnun sýningar í Galleríi Humri eða frægð

Föstudaginn 12. maí kl. 17 verður opnuð sýning í Galleríi Humri eða frægð (í húsnæði Smekkleysu, Laugavegi 59, kjallara) sem markar upphaf Orðsins tónlistar – fjölljóðahátíðar. Þar verða hljóðtengd myndverk eftir Finnboga Pétursson, Harald Jónsson, Kiru Kiru – Kristínu Björk Kristjánsdóttur og Ólaf J. Engilbertsson og bókverk nemenda í LHÍ. Verk nemendanna felast annarsvegar sjálfstæðu bókverki eftir hvern og einn og hinsvegar í bókverkinu Orðið tónlist, sem er upplýsingaaskja um dagskrá fjölljóðahátíðarinnar Orðið tónlist sem verður dagana 19.-21. maí í fjölnotasal Listasafns Reykjavíkur Hafnarhúsi í samstarfi Smekkleysu og Magnúsar Pálssonar við Listahátíð í Reykjavík. Ghostigital leikur við opnun sýningarinnar í Galleríi Humri eða frægð og Bragi Ólafsson og Óskar Árni Óskarsson lesa úr nýútkomnum bókum sínum.
Heildardagskrá Orðsins tónlistar má sjá á vef Listahátíðar www.listahatid.is – en aðrir atburðir hátíðarinnar verða auglýstir nánar á Nýhilblogginu eftir því sem nær dregur.

Ófeigur pistlar í Víðsjá

Nýhil vekur sérstaka athygli landans á því að í dag pistlar í Víðsjá enginn annar en Ófeigur Sigurðsson. Ófeigur kallar verk sín pestarpistla, og mun hann vafalaust einskis svífast í ádrepum sínum. Víðsjá er hér: www.ruv.is/vidsja

Tíu þúsund tregawött

Nýhil vekur athygli á nýju vefriti um ljóðlist, Tíu þúsund tregawött, sem hefur aðsetur hér: www.10000tw.blogspot.com.
Þar verður birt alls lags efni um ljóðlist, íslenska og erlenda, gamla og nýja, framúrstefnu og hefðbundna, og hefur þegar nokkuð birst af efni þó ritið sé einungis þriggja daga gamalt. Að ritstjórn þessa nýja vefrits standa Ásgeir H. Ingólfsson, bókmenntafræðingur, Eiríkur Örn Norðdahl, ljóðskáld, Hildur Lilliendahl, ljóðskáld, Ingi Björn Guðnason, bókmenntafræðingur og Ingólfur Gíslason, stærðfræðingur. Óbreyttum netnotendum og ljóðaunnendum viljum við benda á að heimsækja síðuna.
Ljóðskáldum, bókmenntafræðingum, þýðendum og ljóðaunnendum er bent á að senda inn efni; nánari upplýsingar þar um á: http://10000tw.blogspot.com/2006/05/ritstjrn.html